سەلامەتی هاتوچۆ

تێگه‌یشتن له‌ پارێزراوی هاتووچۆیی ئه‌وه‌یه‌ كه‌ پێویستە هه‌موو پلان و به‌رنامه‌ دارێژراوه‌كانی هاتووچۆیی وه‌ك خۆی جێبه‌جێ‌ بكرێت، لەپێناوی ڕێگرتن له‌ رووداوه‌كانی هاتووچۆ تا ببێته‌ هۆكارێك بۆ پاراستنی مرۆڤ و‌ هه‌موو ئه‌وشتانه‌ی كه‌ هەیەتی.
............
سێ‌ هۆکار كه‌ئه‌بنه‌ هۆی سه‌لامه‌تی هاتووچۆ
1- ئۆتۆمبێل
2- ڕێگاوبان
3- شۆفێر
............
 یه‌كه‌م/ ئۆتۆمبێل
ئه‌و پێداویستیانه‌ی كه‌ گرنگن له‌ ئۆتۆمبێلدا گرنگی پێ بدرێت  ئه‌مانه‌ن:-
1-سپێر واتە (تایەی یەدەگ)
2-ئاگر كوژێنه‌وه‌
3-جانتای فریاگوزاری سه‌ره‌تایی
3- سیگۆشه‌ ی فسفۆری.
4- پشتوێنی سه‌لامه‌تیت كیشه‌ی نه‌بێت.
5-كورسی مناڵ
6-ئێرباگ
7-لایه‌نی كاره‌بایی ئۆتۆمبیل / بۆ زیاتر ئاگاداربوون له‌و رووداوه‌ له‌ناكاوانه‌ی كه‌ توشی ئۆتۆمبیل ئه‌بێت پیۆیسته‌ لایەنی كاره‌بایی و هه‌موو ئاماژەکانی ناو داشبۆردی سه‌یاره‌كه‌ت به‌ ڕێك و پێكی كار بكات تا له‌ كاتی هه‌بونی كێشه‌ یان ئاگادارییەک له‌ ئۆتۆمبێلدا وه‌ك (نه‌مانی به‌نزین ، پله‌ی گه‌رمی بزوێنەری ئۆتۆمبێل یان هه‌بوونی كێشه‌ له‌ پاتری ،.....هتد) ئاگاداری شۆفێر بكاته‌وه‌.
........................................

دووه‌م/ رێـــگاوبان
پێویسته‌ ڕێگاكانی هاتووچۆ له‌ ڕووی هێماكانی هاتوچۆوه‌ گرنگی ته‌واوی پێبدریت لەلایەن لایەنە پەیوەندیدارەکانەوە، وه‌ له‌سه‌ر هاوڵاتی پێویسته‌ له‌كاتی هاتووچۆ كردن لەسەر شه‌قام و ڕێگاوبان و شوێنه‌ گشتییه‌كان ئه‌م ڕێنماییانه‌ په‌یڕه‌و بكه‌ن: 

1-پێویستە هاوڵاتی بەسەر شۆستەکاندا ڕێ بکات وه‌ ئه‌گه‌ر شۆسته‌ نه‌بوو ئه‌وا به‌ پێچه‌وانه‌ی هاتووچۆ واتە لەلایەکی شەقامەکە و ڕووبەڕووی ئوتومبیلە هاتووەکان ڕێ بکرێت. ئه‌گه‌ر شەقامەکان هێڵکاری بۆكرابوو، تۆ له‌ دیوی ده‌سته‌ ڕاستی هێڵەکە‌ ڕێ بكه‌، وه‌ هه‌وڵ بده‌ پردی په‌ڕینه‌وه‌کان به‌كار بهێنیت لەو شوێنانەی کە پردی پەڕینەوەی لێیە. 
2- به‌رده‌وام تەماشای راست و چه‌پی خۆت بكه‌و له‌كاتی په‌ڕینه‌وه‌ ئاماژە بۆ شۆفێر بكه‌ تا ئاگاداری بكه‌یته‌وه‌ له‌وه‌ی ئه‌په‌ڕیته‌وه‌ و هه‌وڵبده‌ نه‌شڵه‌ژێیت.
3-له‌كاتی په‌ڕینه‌وه‌ به‌رده‌وام ره‌چاوی هێماكانی هاتووچۆ بكه‌.
4- شه‌وان جلێك له‌به‌ر بكه‌ كه‌ ره‌نگ بداته‌وه واتە (فسفۆربێت یان کەمێک فسفۆری تیادابێت)‌ ئەمە وا دەکات شۆفێرەکان پیادەکان باشتر ببینن بەشەوان بە تایبەتی لەو شوێنانەی ڕووناککەرەوەی تیادا نییە.
5-له‌کاتی نەبوونی جلێکی فسفۆری و لە شوێنی تاریكدا هه‌وڵبده‌ رووناكییه‌ك به‌كار بهێنیت، ئه‌گه‌ر هیچ روناكییه‌كت ده‌ست نه‌كه‌وت ئه‌وا  فلاشی كامێرای موبایله‌كه‌ت باشترین چاره‌سه‌ره‌.
6-ئاگاداری منداڵه‌كانتان بن و مه‌هێڵن له‌سه‌ر جاده‌كان یاری بكه‌ن  یان  به‌ته‌نیا لە شەقامەکان بپەڕنەوە. 
7-له‌ کەش و هه‌وای ناجێگیردا ئاگاداری ئه‌و چاكه‌ت و قه‌مسه‌ڵه‌یه ‌به‌ كه‌ له‌به‌ری ئه‌كه‌یت با به‌شێوازێك نه‌بیت كه‌ شۆفێر نه‌تبینیت بۆ نموونە ڕەنگە تاریکەکان وەک ڕەش، نیلی یان قاوەیی بەڵک و ڕەنگە کراوەکان بەکاربهێنرێت وەک سپی، سەوزی کاڵ، شینی کاڵ و ... هتد ، هۆکارەکە بۆ ئەوە دەگەڕێتەوە  رێژه‌ی بینین لە کەش و هەوا ناجێگیرەکان کەم دەبێتەوە. 
8-كاتێك به‌ڕێگادا ئه‌ڕۆیت نابێت لە ژێر کاریگەری مەیی و ماددە هۆشبەرەکاندا ڕێ بکەیت یان شۆفێری بکەیت لەبەرئەوەی ڕێگاوبانەکان پێویستییان بەوە هەیە کە تەواو هۆشت لەلای خۆت بێت. 
.............................................................................
سێیه‌م / شۆفێر
شۆفێر گه‌وره‌ترین كاریگه‌ری هه‌یه‌ له‌ راپه‌ڕاندنی هۆیه‌كانی هاتووچۆ، لەبەرئەوە پێویسته‌ شۆفێر ئه‌م تایبه‌تمه‌ندییانه‌ی تیادابێت كاتێك شۆفێری ده‌كات.

1- ئه‌بێت له‌رووی توانای دەروونیەوە ته‌واو ئاماده‌بێت بۆ شۆفێری کردن.
2-  ئه‌بێت له‌ڕووی هه‌ست كردن به‌ ئەگەرە‌ نه‌خوازراوه‌كان به‌ردەوام به‌ ئاگابێت.
3-  پێویستە شۆفێر لەوپەڕی هۆشداریدا بێت.
4- شۆفێر پێویستە شاره‌زا بێت یان کەمێک شارەزایی له‌ چاك كردنه‌وه‌ی ئۆتۆمبێل هەبێت.
5- ئه‌بێت ڕێنمایی هه‌موو سه‌رنشینه‌كان بكات بۆ به‌جێهێنانی ڕێنماییه‌ پێویستەکان وه‌ك (به‌كارهێنانی پشتوێنی سه‌لامه‌تی، دانیشتن بەشێوازێکی سەلامەتخوازانە، زۆر قسەنەکردن لەگەڵ شۆفێر)
6- دڵنیابونه‌وه‌ له‌ ئۆتۆمبێله‌كه‌ پێش دەست کردن بەجووڵە وه‌ك چێککردنی (تایه‌ ، ده‌رگا ، ئاوێنه‌ ،پاتری و فڵچه‌) وە هەندێک دڵنیاکردنەوە هەیە پێویستە بکرێت وەک: 

•  نەبوونی لێچوونی ئاو لە ڕادێتەر
• دڵنیاکردنەوە لە توانای پلاک و کارەبایی ئوتومبیل
•  نەبوونی لێچوون لە ڕۆنی مەکینە، گێڕ یان هەر جۆرە شلەیەکی تر. 

8- پێویسته‌ شۆفێر ئاگاداری ڕێنماییه‌كانی هاتووچۆبێت و شاره‌زابێت له‌ ناسینه‌وه‌ی هێماكان، هەروەها پێویسته‌ ته‌واو گرنگی به‌ هێڵه‌كانی سه‌ر شەقامەکان و ئاماژەکانی پۆلیسی هاتوچۆ و ترافیک لایت بدات.

به‌هیوای سه‌لامه‌تی بۆ هه‌مو لایه‌ك و په‌یڕه‌و كردنی ڕێنماییەکانی هاتووچۆ

ئاماده‌كردنی /  ڕاوێژ بێستون سابوراوایی