سیمینارێكی تایبەت بە ماتۆڕسكیل لە هاتووچۆی سلێمانی بەڕێوەچوو

ئەمڕۆ (7/2/2019) لە هۆڵی گۆبونەوەكانی بەڕێوەبەرایەتی هاتووچۆی پارێزگای سلێمانی‌ و بە ئامادەبوونی عەمیدی مافناس (فەرەیدون عومەر ئەحمەد) بەڕێوەبەری هاتووچۆی سلێمانی‌ و ژمارەیەك لە ئەفسەرانی بەڕێوەبەرایەتی هاتووچۆ سیمینارێكی تایبەت بە ماتۆڕسكیل لەژێر ناونیشانی (ناساندنی ماتۆڕ‌و مانۆڕەكانی) ئەنجامدرا.

سەبارەت بەناوەڕۆكی سیمینارەكە (خالید محەمەد) ڕاهێنەری گشتی تیۆری‌و پراكتیتكی لە نوسینگەی شێواز بە ماڵبەڕی هاتووچۆی سلێمانی ڕاگەیاند: ئەمڕۆ لە هاتووچۆی سلێمانی‌و بە بەشداری ژمارەیەك لە ئەفسەرانی هاتووچۆی سلێمانی سیمینارێكی تایبەت بە ماتۆڕسكیل لە ژێر ناونیشانی (ماتۆڕ‌و مانۆڕەكانی) ئەنجامدرا، جەختی لەوەشكردەوە، لە ئێستادا لە عێراق بەگشتی‌ و  هەرێمی كوردستان بە تایبەتی، كێشەی ماتۆڕ بۆتە كێشەی هەنوكەیی‌ و هەموو كات بەڕێوەبەرایەتیەكانی هاتووچۆیان بەخۆوە سەرقاڵ كردووە،
 بۆیە بەپێویستمان زانی لەڕووی زانستیەوە ئەرك‌و مەهامەكانی ماتۆڕ‌و  ئەو ڕێسا‌و یاسایانەی بۆ فێرخوازێكی ماتۆڕ گرنگە‌و بە چەند پرۆسەیەكدا تێپەڕدەبێت بخەینەڕوو، بۆ ئەوەی لە داهاتوودا ئەو فێرخوازە ببێتە شۆفێرێكی سەركەوتوو لەسەر شەقام‌و ڕێگاو بانەكاندا.

(خالید محەمەد) ئاماژەی بەوەشكرد، هەستاون بە ئەنجامدانی ئەم سیمینارە بۆ ژمارەیەك لە ئەفسەرانی ناو بەڕێوەبەراتی هاتووچۆی سلێمانی، بەهیوای ئەوەی ئەم جۆرە سیمینارانە ببێتە خاڵی ئاڵوگۆڕی زانیاری‌و هەماهەنگی زیاتر لە نێوان هاتووچۆ‌و نویسنگەكانی شۆفێریدا.