سیستەمی نوێی مۆڵەت لە هاتووچۆی سلێمانی کاری پێدەکرێت

ئەمڕۆ لە مەراسیمێکدا سیستەمی نوێی مۆڵەتی شۆفێری لە بەڕێوەبەرایەتی هاتووچۆی پارێزگای سلێمانی بە رەسمی کەوتە کار.

بە ئامادەبوونی (دکتۆر. هەڤاڵ ابوبکر) پارێزگاری سلێمانی و (دکتۆر. سامی جلال) ڕاوێژکاری وەزیری ناوخۆی حکومەتی هەرێمی کوردستان وە (عمیدی هاتووچۆ: عمر نامق) بەڕێوەبەری هاتووچۆی سلێمانی (بە وەکالەت) و ژمارەیەک لە بەڕێوەبەرانی بەش و هۆبەکانی ناو بەڕێوەبەرایەتی هاتووچۆ مەراسیمێک سازدرا بۆ بە رەسمی کردنەوەی پڕۆژەی سیستمی نوێی مۆڵەتی شۆفێری لە پارێزگای سلێمانی.

عقیدی هاتووچۆ (شیلان عثمان مجید ) بەڕێوەبەری بەشی مۆڵەت لە لێدوانێکدا بۆ ماڵپەڕی هاتووچۆی سلێمانی رایگەیاند کە سیستەمەکە لە ڕێکەوتی ٢٧/١٠/٢٠٢٢ بەشێوەی ئەزموونی (تێست) کاری پێکراوە و دوای سەرکەوتووبوونی پڕۆژەکەو نەبوونی گرفت رۆژی دووشەممە ڕێکەوتی ١٤/١١/٢٠٢٢ بەشێوەیەکی فەرمی پڕۆژەکەمان خستە کار، وە رۆژانە ٣٢٠ بۆ ٣٤٠ مۆڵەتی شۆفێری بە هەموو جۆرەکانیەوە مامەڵەکانیان ڕایی دەکرێت.

جێی ئاماژە پێکردنە لە ئێستادا ئەفسەران و کارمەندانی بەشی مۆڵەتی بەڕێوەبەرایەتی هاتووچۆی پارێزگای سلێمانی  بەمەبەستی تەواوکردنی مامەڵەی ئەو هاوڵاتییانەی داواکارییان پێشکەش کردووە بۆ وەرگرتن و نوێکردنەوەی مۆڵەتەکانیان لە بینای بەڕێوەبەرایەتی هاتووچۆی سلێمانی تا کاتژمێر (٦) ی ئێوارە ئەمێننەوە.